CodeperateMind Sports Olympiad 2021 | 齋浦爾 Jaipur | 金牌得主 Raphael : 心態是致勝關鍵
今日我哋又好榮幸可以邀請到Mind Sports Olympiad 2021【Jaipur 齋浦爾】的金牌得主Raphael過嚟分享得獎感受。【Jaipur 齋浦爾】係一隻二人的策略遊戲，透過拿取駱駝及貨物，再將貨物賣出獲得分數。
- Mind Sports Olympiad 2021 齋浦爾 金牌
- 棋齡：17年桌遊
- 愛好：歷史巨輪
點樣開始接觸Board Game?
我由6歲已經開始玩Boardgame，當時同隔籬鄰舍嘅一對孖仔好Friend，每日放學都會一齊玩【Sitting Ducks Gallery 射鴨子】、【For Sale 地產達人】等等嘅Boardgame。8歲已經參加過大富翁香港賽。到咗3、4年前，我去咗外國exchange，當時去新地方無乜Friend，所以就日日喺Board Game Arena到玩。通常都係上堂無聊得濟開一鋪10幾分鐘嘅輕策Game，例如【7Wonder 七大奇蹟 】、【Jaipur 齋浦爾】等等。
你鐘意玩乜類型Board Game?
我依家鐘意玩重策Game，最近迷上咗玩【Through the ages 歷史巨輪】。出嚟做嘢之後，我需要搵嘢令自己個腦可以輕鬆下，輕策Game已經做唔到呢件事，因為輕策Game唔洗用腦，玩完之後會放鬆唔到。反而重策Game就唔同，我玩回合制居多，有時返工返到好攰，會停一停工作去行一步棋，咁樣反而會對工作更加有效。而且重策Game滿足感大，贏咗會覺得自己行得好好，輸咗都可以諗返到底自己邊步可能行錯，有好大嘅反省同進步空間，所以永遠都玩唔完一隻Game。
點解你會參賽？
其實我一直都有參加世界級Boardgame隊制賽【United We Stand】，係嗰到識咗一班隊友，佢地有人推介咗Mind Sports Olympiad。咁我就去睇下參賽時間夾唔夾，Mark底咗邊啲識玩，邊啲鍾意玩，邊啲鐘意玩又玩得好。我無諗過拎獎嘅，純粹係報咗名先，到時想玩就參加一下。我記得比賽嗰晚係星期六，夜晚訓唔住，去到2點幾就順便參加比賽。諗著雙敗淘汰賽，好快輕鬆輸兩場出局就可以就去訓覺，點知一路都輸唔到，到最後就贏咗個冠軍。
賽前點樣去備戰？
我比賽前有半年無玩過【Jaipur 齋浦爾】，所以都無乜點做過備戰準備。唯一係每日沖涼嘅時候我會不斷諗【Jaipur 齋浦爾】嘅唔同策略，諗咗好多方法去剋制對手。有好多人覺得呢隻係一隻Luck Game，我反而覺得呢隻Game主要就係玩點樣去利用駱駝去提高自己個勝率，識玩同唔識玩其實贏面可以去到九成半。
你以不敗嘅成績打完整場賽事，你覺得你係邊一方面優勝於對手？
我覺得係心態，其實最大原因係第一場第一局輸咗俾一個好弱嘅選手，係成場賽事唯一一次係處於落後狀態進入第二局。因為係三盤兩勝，要連贏番兩局先可以贏，再加上對一個咁弱嘅對手都可以輸，完全唔能夠接受。所以之後每一步都好認真，每一步都要諗清楚，有冇其他選擇可以行？依家係領先緊定落後緊？時時刻刻都提醒緊自己有咩戰術，平時行一步用1秒時間，比賽要用5秒先可以行到一步。
可唔可以分享一下【Jaipur 齋浦爾】嘅遊戲策略？
呢隻遊戲嘅目標係同對手Equal turn之下可以攞比對手多嘅分數，分數嘅來源係手牌，攞多啲牌就可以賣多啲。平時每回合淨係可以一場一場咁攞牌，攞「駱駝」可以一次過攞4-5張，所以「駱駝」係成隻Game嘅重點。幾時去拎「駱駝」？幾時放「駱駝」出黎迫對手幫自己開牌？就係成鋪Game嘅勝負所在。
開局除非場上有貴價牌要攞，否則一定係攞3個或以上嘅「駱駝」，「駱駝」即是手牌，愈多手牌可以運用嘅策略就愈多。開局開好野俾對面其實無咩所謂，貴價牌金色銀色5-6分1個，其實平價牌都5分3分1個，對手Trade嘅Value其實好低，例如：Trade 2張牌，用6分去換10分個Net Gain都只係4分。
所以開局嘅策略係，自己避免Trade，而且迫對手Trade。要做成依個效果，就要迫對手拎7張牌，而自己唔夠7張牌。當對手7張牌嘅時候，攞場上的牌或「駱駝」去期望開到貴價牌。對手因為手牌上限的關係，要拿取貴價牌就一定要Trade，咁對手就會陷入兩難的局面。
當遊戲進入中盤的時候，平價牌已經只值1-2分，這個時候攞「駱駝」就會好危險，好大可能會開好牌俾對手。所以依個時候就可以運用「5駱駝」策略，如果自己手牌比對手多，可以Trade到出面有「5駱駝」。因為對方少牌過你，雙方一張一張牌咁賣手牌，最終對方一定要攞「5駱駝」去幫你開好牌。
如果你發現對方很有可能下一步用「5駱駝」策略攻擊你，而自己手牌又不夠多，可以用「4駱駝」策略去反制，利用Trade將場上控制至4張「駱駝」。因為Trade的限制是至少要Trade 2張貨物牌，而場上只有1張貨物牌，所以對手不能使用Trade去採取「5駱駝」策略。因為「4駱駝」攻擊性不及「5駱駝」強烈，有時候讓對手可以選擇，反而會更容易引到對手拎「4駱駝」。
成隻Game大約73分就可以贏，高分局要76-78，低分局55分左右就已經夠。無記分的話去計一計場上淨番幾多分，自己已經攞咗幾多分，去確定自己嘅位置係領先還是落後。如果自己已經夠贏，就要盡快Call End去降低不確定性。如果自己落後緊，就需要去做更多奇怪嘅Move去搏。呢隻Game係有先手優勢，因為先手多一Trun，大約會多5-6分左右，所以後手要贏係需要搏嘅。
