Mind Sports Olympiad 2021 | 璀璨寶石 | 銅牌得主 Joe Chan

【Splendor 璀璨寶石】係一隻目標明確、規則簡單嘅輕策入門Board Game。今日有幸可以邀請Mind Sports Olympiad 2021 銅牌得主 Joe Chan 過嚟接受訪問。

• Mind Sports Olympiad 2021 璀璨寶石 銅牌
• World Catan Championship 2012 卡坦賽 亞軍
• 棋齡：24年桌遊
• 愛好：大富翁、卡坦島、璀璨寶石
• Facebook：Joe Chan

你鐘意玩乜類型Boardgame？

我鐘意玩一啲可以同其他玩家交易、需要講多啲嘢嘅Board Game，例如「大富翁」及「卡坦島」，因為遊戲過程可以有更多互動，需要理解人哋諗緊乜。另外就鐘意玩一啲 Combo Game，例如:【Splendor 璀璨寶石】、【Dominion 皇輿爭霸】、【Race for the galaxy 銀河競逐】，可以砌一啲唔同嘅Combo，Game類型偏輕中策。

為什麼你會參賽？

我喺2012年攞咗卡坦世界賽亞軍，其實本身對於參加唔同類型桌遊比賽都有興趣，再加上剛剛奧運完結。我希望自己參賽之餘，亦推廣俾更多人知其實香港桌遊界好強，例如1996年同2016年分別出咗大富翁同矮人礦坑世界賽冠軍。我都會喺Facebook叫多啲唔同人參加Mind Sports Olympiad，據我所知就有人因為我嘅推廣而參賽攞獎。

今年比賽你參加成3個項目，包括璀璨寶石、卡坦島、皇輿爭霸。賽前係點樣備戰？

【Dominion 皇輿爭霸】無特別嘅備戰，純粹係自己想玩。【Catan 卡坦島】就會聯同香港卡坦協會會友網上約戰，而平時都會約唔同嘅Gathering。【Splendor 璀璨寶石】訓練得最多，我會喺BGA參加唔同錦標賽，但因為時間所限，我玩唔到即時制，只能玩回合制。我最近大概參加咗100個錦標賽，過程中認識到唔少日本台灣嘅強勁選手。

為什麼璀璨寶石賽制是3人遊戲？與4人遊戲嘅分別在那裡？

「璀璨寶石」最佳遊玩人數是3人。3人同4人最大分別係每隻顏色嘅Token數目。4人Game係7粒Token； 3人Game係5粒Token。4人Game會更容易買到高分牌、好多時候4至6張牌已經夠分贏。而3人Game互相卡嘅機會高啲，好多時候我卡下家，下家卡我上家，然後上家卡我，形成循環，因此互動性及平衡性相對較好。

可以分享一下璀璨寶石的遊戲策略嗎？

基本上第一回合一定會Keep牌，直到攞走哂場上「黃金」。如果係4人Game，唔需要打「貴族」，淨係靠打高分牌已經夠贏；而3人Game需要7至8張，如果可以打埋順色「貴族」，3分優勢可以影響好大，而Level 1牌都需要1至2張，最要原因係3人Game Token得5粒，好多時候就係差嗰一兩粒出唔到一啲高分牌。

我覺得玩得好呢隻Game嘅人好係大局觀比較好。例如會預計到淨返幾張牌會影響成場發生咩事，代入其他玩家視角預計佢哋會做咩行動，甚至係利用自己行動導上家或下家強迫做一啲行動。

有一局你起手唔係Keep牌，而係攞2白，點解會咁傢呢？

開局除Keep牌之外，都需要留意場上資源嘅消耗量，場上白色資源嘅消耗量大。攞2白嘅主要目嘅係瞄住「421」張2分牌，其實「421」2分牌係呢個遊戲隱藏好物嚟，一turn攞兩白、一turn白藍黑、咁樣只係差一粒白同一粒藍。但基本上白唔會再攞到，所以要用白搭Keep咗佢，咁攞多一粒藍就可以出到。總計4個行動換2分，早期無其他牌可以4個行動做到呢件事。

實戰開局有啲位我係瞄住下家嚟打，因為佢個BGA Rank分高，所以某程度上想㩒一㩒住下家，等佢唔好咁順做到嘢。下家一開始Keep走張「421」需要4白，所以我唔想咁快放啲白出嚟俾下家攞，最想做嘅嘢係等下家爆Token時候先再放返啲白token出嚟，等佢想拎白就要dump嘢拎，可以嘥佢嘅行動數。

下年會唔會繼續參賽？

如果唔係去返倫敦搞，我下年都會繼續玩。重點係我又未贏過世界冠軍，想提升成個香港桌遊嘅風氣同埋力度。香港桌遊界其實有好多臥虎藏龍嘅人，甚至都未出哂嚟。如果有更多香港人知道呢件事，就可以有更多人參賽，甚至可以出嚟互相切磋練習。