Mind Sports Olympiad 2021 | 勃根地城堡 | 金牌得主鄭冬日Sunny

Mind Sports Olympiad 2021 是智力運動的國際賽事、有超過100種不同的項目。由國際象棋、圍棋、拼字遊戲等經典棋類，到新式的桌遊，包括卡坦島、七大奇蹟、璀璨寶石等等。今日我哋邀請到【Castle of burgundy 勃根地城堡】嘅金牌得主鄭冬日Sunny接受訪問。

• Mind Sports Olympiad 2021 勃根地城堡 Castle of burgundy 金牌
• Mind Sports Olympiad 2021 波多黎各 Puerto Rico 銅牌
• 棋齡：3年重策桌遊
• 愛好：勃根地城堡 波多黎各 農家樂 瑪雅曆法 俄國鐵路 歷史巨輪
• Facebook：鄭冬日
• Instagram：tungtung369 sunny.game.theory
• Board Game Arena：Sunny369

點解會開始玩Boardgame？

我中學時候玩開三國殺同卡坦，當時以為Board Game就淨係得咁樣。入到大學參加咗Games Society Ocamp，之後就同大學師兄一路玩愈黎愈多唔同類型嘅Board Game。

你鐘意玩d乜類型既Boardgame？

我鐘意玩Action Drafting類型嘅Boardgame，Action Drafting指玩家要喺有限行動入面做選擇，可用嘅行動數量有限，一旦玩家選擇咗一個行動，其他玩家就唔能夠再次選擇。𠵱類型嘅Game比較複雜、變化性高，而我對自己嘅創意同計算力都非常有自信，可以喺複雜而充滿變化嘅遊戲搵到OP Combo，從而得到成就感。

你總共參加咗【勃根地城堡】、【波多黎各】、【農家樂】3個比賽項目，賽前點樣去做備戰？

因為比賽次序係「農家樂」，之後「波多黎各」，最後係「勃根地城堡」，所以「農家樂」準備得較耐，其次係「波多黎各」同「勃根地城堡」。備戰方式都係喺Board Game Arena上網同高手對決，然後做賽後檢討，睇邊個位可以改善。當發現新打法出嚟效果唔錯，就會喺Chat Box同對手互相交流，精進自己打法。博愛嘅桌遊發燒友會毫不吝啬分享自己嘅策略，我喺當中都獲益良多。

可唔可以分享一下【勃根地城堡】嘅遊戲策略？

前期嘅目標係先完成1至2塊版塊嘅小區域，快速搶得完成區域分數，而早期最好嘅牌係「礦」、「知識」、「城堡」、「城市建築」。「礦」係早期最強版塊，應該不惜一切賣骰換worker都要搶；「知識」係其次，「知識」版塊早期取得可以trigger多幾次；而「城堡」、「城市建築」可以提供額外行動令你更快擴展自己的版圖。

至於「行船」需要跟據順位以及其他玩家決定，如果順位較後可以考慮「行船」，目標係新時代時候可以做首家。而「動物」前期不考慮，因為它只是純粹提供分數，對遊戲營運沒有幫助，而中後期「動物」嘅目標係將最大塊嘅動物區域填滿同一種「動物」。

開賽嘅第一場係你唯一輸左果場，僅僅以4分惜敗，你覺得輸嘅原因係邊個位到？

首先分析下依塊Board，特點係中間有一塊8個版塊嘅超大型城市建築區塊。要知道城市建築只有8個種類，所以需要每個種類都放一塊才能完成這個大型區塊，雖然完成後的分數很高，但萬一被其他玩家卡到無法完成，這樣就會跌落第四名的境地，因此風險都很大。

而第一場見到有2位BGA排名分數超高嘅選手，加上抽到第四家順位較後。始終都係第一場，喺唔清楚對手的實力情況下，我決定採取求穩策略，一開始就決定放棄完成大型區塊，係動物及知識版塊追回失去的分數，將競爭城市建築的壓力交給其他三個玩家。最後都只係差4分攞到第2，我會覺得係一個比較好嘅結果。

精彩重溫: https://boardgamearena.com/table?table=199646886

決賽的一場，我發現只有你一個的起始位置喺左下角，而其他玩家都係中間開始，當時有咩戰術考慮?

呢個絕對係勝利原因，因為依塊Board特點係好分散，而且相同顏色嘅區域距離相對遠，例如「城堡」同「礦」，佢地分別喺3個角落，完成一個行去另一個會非常曬時間。而「礦」嘅價值非常高，因為我係頭家，一定可以搶到一塊「礦」，所以起始位置唔會選擇無「礦」相鄰嘅中間「城堡」。再分析3個角落「城堡」，上方「城堡」相鄰「動物」，但砌「動物」唔會帶嚟其他效益，所以不考慮。左邊「城堡」相鄰五塊「城市建築」大區域，前期會想先完成小區域，所以都不考慮。而下方「城堡」有大量小區域，亦相鄰早期很強的黃色「知識」區域，所以會選擇呢個位置開局。

而正因為其他玩家在中央開局，相鄰大量藍色區域導致他們會攞藍色行船搶Starter，依到我要分享一個故事，叫5美元的拍賣：在這一場遊戲中，一群參與者共同參與競拍一張5美元的紙幣，其中出價最高的會得到那5美元，但出價第二高的也得支付他出的價錢，最終會導致雙方都以高於5美元的價格成交，雙方都損失慘重。而決賽情況就好似咁，佢地一洗濕左個頭就番唔到轉頭，明明差一步船就可以搶到Starter，就會令到佢地好想行船，然後進入左無盡搶Starter地獄。

而係其他玩家搶緊船嘅時候，我就係動物到拎到相當高嘅分數，依個就係同第二名拉開成40分差距嘅關鍵所在。正因為佢地爭船爭到疲於奔命，導致唔夠時間去攞動物跑分，最後有兩家完全無跑到動物。

精彩重溫: https://boardgamearena.com/table?table=199738867

如果大家想繼續睇Sunny嘅另一隻得獎項目【Puerto Rico 波多黎各】的精彩訪問，記得留意開Game啦！