Codeperate中秋節 | 十大桌遊 | 中秋節除左食燈籠玩月餅仲可以做啲咩？精選10隻適合過節既Boardgame
仲有唔夠兩個禮拜就係中秋節，隨著疫情穩定，相信好多人都會打算同親友共聚賞月，除咗「食燈籠玩月餅」之外仲可以做啲咩？咁就梗係要玩返啲有節日氣氛嘅桌遊啦，小編精選咗十隻適合一家大細玩嘅Game介紹畀大家，快啲睇下有無適合你哋㗎啦！
月餅達人 遊戲人數: 2-4人 遊戲時間: 20-30分鐘 適合年齡：10歲以上
玩家化身月餅學徒，喺《月餅達人 Mooncake Master》入面，以抽取、分享及拼湊月餅板塊，製作精美月餅滿足顧客，累積最多分數嘅玩家將獲得勝利。遊戲分成3輪，每輪會抽出一張顧客卡，玩家以輪抽方式挑選月餅碎件，併湊唔同口味及餡料月餅。玩家最後需要拼出3個完整月餅，並根據月餅內容計算分數。
花燈盛會 遊戲人數: 2-4人 遊戲時間: 30分鐘 適合年齡：8歲以上
《花燈盛會 Lanterns The Harvest Festival》取材自東方傳統放水燈民俗活動，玩家將會扮演布置宮殿湖泊嘅水燈工匠，放置水燈板塊獲取水燈卡及恩賜指示物，透過收集遊戲嘅規定組合，獲得最高榮譽嘅玩家勝出。
抓月亮 遊戲人數: 2-4人 遊戲時間: 20分鐘 適合年齡：6歲以上
嫦娥奔月就聽得多，《抓月亮 Catch the Moon》將追月嘅任務交畀一眾玩家，考驗大家嘅平衡感。玩家需要跟據擲出嘅骰，利用單手擺放梯子。過程中，如果玩家擺放梯子嘅方法無跟規定，將會有「月亮眼淚」作為懲罰。當最後一個「月亮眼淚」或梯子被取去後，遊戲將會結束，獲得最少「月亮眼淚」嘅玩家贏出。
兔子王國 遊戲人數: 2-4人 遊戲時間: 45分鐘以上 適合年齡：14歲以上
中秋節除咗月亮係主角之外，又點少得兔仔。玩家作為《兔子王國 Bunny Kingdom》入面嘅兔仔班主，為咗兔仔們嘅福祉征服新世界。班主要喺遊戲中建設城市、開墾資源，生產黃金蘿蔔，一步步令你嘅封地變得更加繁榮，同時亦要完成國王陛下指示，最英勇嘅一位就能成為兔子國王嘅「大耳班主」。
一夜終極狼人 遊戲人數: 3-10人 遊戲時間: 10分鐘 適合年齡：14歲以上
中秋正值月圖之夜，當然要化身狼人啦！《 一夜終極狼人 One Night Ultimate Werewolf》同以往玩開嘅狼人唔同，每個玩家依然都會扮演各自角色，但喺晚上進行行動期間，眾人嘅身份將會被調換，身份同遊戲目標都可能有天翻地覆嘅變化，一改以往被殺後只可以等新一局重新開始嘅玩法。
5秒定律 遊戲人數: 3人或以上 遊戲時間: 自行決定 適合年齡：10歲以上
要數玩法簡單嘅桌遊，相信《5秒定律 5 Second Rule》 認第二無人敢認第一。玩家只需抽出卡牌，按卡牌所寫嘅主題，喺5秒內按主題講出3個正確內容，就可以獲得分數。遊戲配件中亦附有一個沙漏作為計時器，玩家們一邊望住沙漏入面嘅圓珠向下走，一邊要講出3個正確內容，增加遊戲刺激感。
估估劃劃 遊戲人數: 4-12人 遊戲時間: 40-60分鐘 適合年齡：4歲以上
有玩過猜猜畫畫的話，《估估劃劃 ALIAS》都一定唔會難到你，簡單嚟講佢就係講嘢版本嘅猜猜畫畫。玩家可以透過同義、反義、聯想同暗示等說話技巧，形容牌中嘅文字畀隊友估，但期間唔可以用其他語言，亦唔可以提到題目嘅字同做動作，限時之內估到最多題嘅組別就可以嬴出。
傳情畫意 遊戲人數: 4-8人 遊戲時間: 20分鐘 適合年齡：6歲以上
覺得用說話表達嘅遊戲有難道? 咁就可以試下玩《傳情畫意 Telestration》啦，遊戲需要玩家以傳遞方式，繪畫出同題目相關嘅畫像。遊戲開始時，第一個玩家睇到題目後畫出首個圖像，其餘玩家就按上手玩家所畫的圖像意會題目，再繪畫新圖像，最後一位玩家就要估出題目內容。可能你會質疑，咁自己喺屋企拎張白紙都可以玩啦，唔使隻Game。當然的確係會玩到，不過買咗就可以唔使自己諗題目，亦都可以利用配件中包含嘅可重用速寫簿，環保啲咁話!
籤籤入扣：酷黑版 遊戲人數: 4-8人 遊戲時間: 20分鐘 適合年齡：6歲以上
《籤籤入扣：酷黑版 Stick Stack: Cool Black》 玩法類似層層疊，玩家需要抽出遊戲籤，按相同顏色，單手將籤放到搖搖欲墜嘅籤堆上。今次介紹嘅酷黑版增加咗指定動作牌，玩家喺放籤前要先抽動作牌，跟據牌嘅指示再放籤，提升整個遊戲難度，同時令遊戲氣氛更加緊張。
妙語說書人 遊戲人數: 3-6人 遊戲時間: 30分鐘或以上 適合年齡：8歲以上
只要發揮你嘅想像力，《妙語說書人 Dixit 》將會出現好多意相不到嘅笑料。遊戲包含84張圖像牌，每人開始時會獲分發6張。玩家會輪流充當說書人嘅角色，喺手中挑選一張牌，並就住牌中嘅圖像講出一句相關嘅說話，其他玩家依照說書人嘅句子，揀一張你覺得最相近嘅牌交出，其後會將各人嘅牌洗勻後翻開，玩家就要估岀邊一張係屬於說書人。
